يوم الأربعاء في منزل داليا فترة ما بعد العصر
أم حازم (في غرفة النوم ) : أبو حازم بقولو بعد بكرا النتائج
أبو حازم (و اقفا يبحث في خزانته ) : نتائج شو ؟
أم حازم (مستغربه و ترفع حواجبها ): ول ناسي؟ بنتك توجيهي ولا ما كنت بتعرف
أبو حازم (وهو يحك رأسه ): أه والله توجيهي , شو ما كنت بعرف شو قصدك
أم حازم : ولا شي
أبو حازم : على كل الله يستر
أم حازم (تحرك يديها باستفهام ): امين , شو شكلك مش واثق من بنتك
أبو حازم: البنت شو ما تجيب نعمه مش راح تفرق اكتير
أم حازم (بنبرة حادة ): ليه , لتكون مش ناوي ادرسها جامعة او كليه , اسمع انا ما بخليها بوجهي
أبو حازم (صوت يرتفع و ينخفض و بعصبية ): لا , يعني انا يلي انتكب , مش لما تخلص اختها الجامعة , من وين بدي الحق انا شغلين و بشتغل وبنتك بجامعة حكومية يعني ارخص من هيك مافي , مالي حمل ادرس ثنتين , بعدين مش لما تنجح و تجيب معدل يدخلها جامعة حكومية
أم حازم:قول ان شاء الله تنجح و تيض وجهنا
أبو حازم (وهو يخرج ثيابه و يخلع ما يرتدي ):ااه ان شاء الله , كويس ما حدا بيعرف انه عندي بنت توجيهي
أم حازم(نبرة استهزاء ):ليه مستحي يعني ؟؟؟؟
أبو حازم :لا بس بنت ابو طلال جابت السنة الماضية 97 , و بنت المراسل جابت 87 , و بنتك وبعرفها مش شغل معدلات
أم حازم:هلا صار اسمها بنتي ؟؟ يعني مش بنتك
أبو حازم (وهو ينتهي من لباسه ):يلا سمعني الشريط تبع كل مرة انا مش مهتم بالبيت و مقصر
أم حازم (بنبرة حزينة ):شريط ؟؟ هلا هيك يا ابو حازم كلامي صار زي الشريط
..أبو حازم (وهو يقف امام المرآة يصفف شعره ): خلص خلص , انا زهقت من هاد الحكي لنشوف شو بتجيب البنت بعدين منحكي , انا طالع على القهوة , سلام
أم حازم (نظرة استغراب و تعجب ):نفس اعرف شو بتعملو بالقهوة بس
أبو حازم (بإبتسامة عريضة ): منحكي على النسوان هههههه
يخرج ابو حازم من الغرفة و يخرج من المنزل , تتوجه ام حازم إلى غرفة البنات , لتجد أبنتها ديمة على جهاز الكمبيوتر تضحك و تطبع على الكي بورد , يلفت نظرها بعض الرسومات على الشاشة من ورد و قلوب , تدخل إلى الغرفة لتنظر بوضوح , تحس ديمة على دخول امها ف تغلق بعض النوافذ
ديمة (بصوت عفوي ): في شي ؟
الأم (نبرة استغراب , و هي تحاول فهم ما يجود على الشاشة ): لأ , شو عم تعملي؟ و ايش هاد الموقع
ديمه(تجاوب بحذر ) : عم بحكي مع صحباتي , هاد موقع كروت
الأم: كروت شو يماما؟
ديمة : هاد موقع , اذا الواحد بدو يبعت كرت معايدة او تهنئة هيك أشياء , بحط عنوان يلي بدو يبعتلو و بيوصلو
الأم (وهي تحس انها لم تفهم شي ): اه اه طيب كويس
الأم (وهي تؤشر على اسفل الشاشة ) : هاي ليش هيك عم تضوي و تطفي ازرق شو يعني ؟
ديمة (محتارة ): اه ولا أشي هي هيك لحالها
الأم (تحس بشي في كلام بنتها و تحاول اكتشاف الموضوع ) : بس ما كانت هيك قبل شوي هيك كانت طافية , اكبسي عليها
ديمه (وهي تنظر يمين و شمال و تحاول التهرب بإختلاق موضوع اخر ) : صحباتي بحكولي انه النتائح بعد بكرا
الأم : اه و انا هيك سمعت
ديمة : انا بدي ادرس جامعة من هلا
الأم(وهي نتظر ببإتسامة مبهمة ) : اكيد ياماما رح تدرسي جامعة بس
ديمة: هاد الحكي من عندك ولا من عند ابوي
الأم(وهي تلمس رأس بنتها بحنية ) : من عند ابوكي
تخرج الأم من الغرفة و هي تتمتم مع نفسها
Atom Feed (xml)
No comments:
Post a Comment