الحلقة الحادية عشرة \ الموسم الثاني

كتبتها ملائط

****

المشهد الاول

المكان: منزل داليا
الزمان: الثالثة عصرا

انهت ام حازم تنظيف المطبخ بعد ان فرغ الجميع من تناول طعام الغذاء و توجهت الى غرفة الجلوس.رأت ان زوجها قد غط في سبات عميق على اريكة غرفة الجلوس و قد غطى شخيره على صوت نانسي و هي تشخبط ..تنهدت في داخلها و هزته من كتفه

ام حازم: ابو حازم عدّل نومتك
ابو حازم وقد انتفض :ا ا شو في انا صاحي
ام حازم: شو صاحي ..شخيرك واصل اخر الحارة
ابو حازم: شخيري؟ انا ما بشخور
ام حازم: اه ..طيب ..بدي اعرف احضر اخر حلقة من المسلسل..روح نام جوا اريحلك
ابو حازم: لا كويس هون كويس

و ارتفع صوت الشخير ثانية

ام حازم و قد اعتادت هذا السيناريو اليومي.بدات بمتابعة مسلسلها ,عندما بدا الهاتف بالرنين المزعج
القطت السماعة و كانت ام سرور على الجانب الاخر

ام سرور: مرحبا ام حازم كيفك..ما اكون ازعجتك
ام حازم (شبه مستمعة لها): لا لا اهلين
ام سرور:والله يا ام حازم هدول جماعتنا اعتذروا ,ما رح يقدروا يجوا عماد اضطر يسافر طلبوه في الرياض ضروري

ام حازم الان في انتباه تام للمكالمة الهاتفية: هيك فجأة؟ ليكون يا ام سرور سبب تاني و انتي ما بدك تقولي؟؟
ام سرور: سبب تاني؟ لا و الله ام علاء خجلت تحكي معك و طلبت مني اعتذرلك شو بدو يكون السبب التاني
ام حازم: مش عارفة.انا بنتي الف مين يتمناها و اصلا انا اجبرتها تطلع و تقابلهم و هلا بتقولي هم اللي مشش جايين
ام سرور: ما حدا جاب سيرة البنت يا ام حازم بس الناس عندها ظروفها و ان شاء اله بس يرجع بيصير حكي تاني
ام حازم: لا تاني ولا تالت بنتنا مش رمية ولا مش ملاقية ..لو بدي اجوزها زمان جوزتها اجاها عرسان و هية بلمدرسة بس انا ما حبيت افشلك
ام سرور: لا تاخدي الموضوع هيك و الله يا ام حازم البنت بتجنن و انتو ناس اوادم و بتتناسبوا بس هيك صار

ابو حازم و قد انتبه من نومه و عدل جلسته مستمعا بانتباه اشار لها بيديه مهددا

ابو حازم: قوليلها ما ترجع تجيب سيرتهم مرة تانية..نحنا مش ولاد زغار

ام حازم اشارت له بيدها ليخفض صوته

ام حازم: طيب يا ام سرور حصل خير و الدنيا قسمة و نصيب
ام سرور: ما هادا اللي منقوله..و الله انا خجلانه و ب

لم تدعها ام حازم تكمل جملتها:ام سرور..ابقي خلينا نشوفك..تقطعيش الزيارة
ام سرور: و انا بقدر استغني..
ام حازم: مع السلامة
ابو حازم: شو صار..بطلوا يجوا؟
ام حازم: شو بيعرفني بالناقص..اصلا اخته مبين كتير قوية..منيح اللي اجت منهم... داليا ما كان عاجبها كل الموضوع
ابو حازم: وينها داليا؟ نايمة جوا؟
ام حازم: لسة ما اجت
ابو حازم: طيب

..
و عاد الى النوم و ارتفع الشخير

تنهدت ام حازم بحسرة هذه المرة..و قالت في نفسها: يعني اول عريس بيجي يا داليا و ما يرجع؟ شو اللي ما

عجبهم؟ ليكون مش قد المقام ؟... افففت.... راح على نص المسلسل

.......

المشهد الثاني

توقفت سيارة ميراندا امام بيت داليا...فجأة تبخر الاحساس بالفرح الذي غمر داليا عندما احست بتقدم الوقت ..تسارعت دقات قلبها عندما ايقنت انها لا محالة ستتواجه مع والديها...امسكت بهاتفها النقال و اعادته للحياة بعد ان كان مغلقا

ميراندا: شو بتعملي؟
داليا: لما طلعنا سوى فتحت الموبايل و رفعت البطارية ..و انطفى
ميراندا: ليش ؟
داليا: عشان لو حدا اتصل بيطلع لهم لا يمكن الاتصال به ما بطلع مغلق..
ميراندا: ليش كل هيك...ما فهمت
داليا: انا كل يوم برجع العصر عالبيت و هلا تاخرت و اهلي اكيد قلقانين و كان ممكن يتصلوا و انا ما بدي اقول انه طلعت....اهلي صعبين كتير يا ميراندا
ميراندا: برضة ما فهمت.انتي كنتي معي يعني ما في اشي غلط
داليا: بالنسبة الهم كل شي بتعمله البنت غلط.. شكرا كتير ميراندا على احلى طلعة طلعتها بحياتي..يالا باي باي
ميراندا: استني..يعني بفهم انك ما بتطلعي مع حسام؟
داليا: بالليل؟ لا..طبعا لأ..افت..نسيت حسام..اكيد حاول يتصل
ميراندا: حبيبتي.. ما تهتمي المهم انبسطنا ..صح؟

داليا: انبسطنا كتير..ميراندا ..انتي ....انتي كتير رائعة..تصبحي على خير
ميراندا برقة: سويت دريمز

...
فاجاتها داليا بقبلة على خدها و غادرت السيارة و تركت ورائها ميراندا مذهولة

توجهت الى منزلها و هي تهيئ نفسها لعاصفة محتملة و ترتب في رأسها ماذا ستقول..و بدأت رنة الهاتف تعلن عن وصول رسائل نصية عديدة..القت نظرة سريعة و كانت تعرف مسبقا انه حسام..لم يكن لديها الوقت لترد او حتى تقرأ الرسائل

دخلت البيت و علامات الوجل تعتليها لتفاجا بوالدها واقفا امام الباب و بالقرب منه وقفت والدتها و قد تطاير الشرر من اعينهما

ابو حازم: بكير..كان نمتي برة و رفع يده يريد ان يصفعها عندما تدخلت الام
ام حازم: استنى يا زلمة نشوف وين كانت

و توجهت بالكلام لداليا : كمان شوي كنا رح نحكي مع الشرطة. وينك لهلا و ليش تلفونك لا يمكن الاتصال به؟ وين كنتي قولي

داليا:كنت بالجامعة.بدرس بالمكتبة.هناك الاتصال ضعيف

ابو حازم : لهلا بالجامعة؟ في جامعات بتفتح باليل ؟؟ و كيف رجعتي ؟
ام حازم: و ليش ما اتصلتي انتي و قلتي بدي اتأخر
داليا : ما في معي كريديتس بالموبايل..ما قدرت احكي...و لما خلصت دراسة صاحبتي قالت لي بوصلك احسن ما اطلع بتاكسي لحالي و بعدين امها حكت معها طلبت منها غرض تجيبه انا ما قدرت اقول اشي يعني بدي اقولها لا تجيبش الغرض ووصليني؟
ام حازم: و شو هالكياس الي معك؟يعني كنتو بالسوق؟
داليا: ما هية مرت عالسوق تجيب لامها اواعي كانوا بالتصليح و انا شفت محل في اواعي و اشتريت اكم غرض
ابو حازم: و من وين جبتي المصاري؟ انتي اعطيتيها يا ام حازم؟ والله ما انا قادر الحق عليكم من وين انا بدي اضل اجيب فلوس..الله يلعن البنات و الي بيخلف بنات
ام حازم: لا اعطيتها ولا ااشي بتكون حوشت من مصروفها
ابو حازم: مصروفها؟ ما هية دايما بتشكي انه ما بكفيها مواصلات
داليا: بابا انا كان معي مصاري من وقت لعيد خبيتهم ما صرفت اشي و و وو الله ما اكن قصدي اتأخر او اخليكم تقلقوا
انا اسفة
ابو حازم: كل المصايب بتيجي مرة وحدة ..
داليا: ليش مصايب شو صار ..احكوا!!
ام حازم: اهل العريس اعتذروا ..ما راح يجوا..بطلوا

داليا و قد احست بارتياح شديد لكنها تظاهرت عكس ذلك: ليش اعتذروا؟ ليكون ما عجبت ست الحسن اخته..انا من الاول ما حبيتها

..
ام حازم: ام سرور بتقول عماد سافرطلبوه بالشغل

عندما يسمعت داليا اسم عماد تذكرت الشاب الذي اتى الى الجامعة ..تذكرت اين راته من قبل..ارادت ان تفتح فمها لتخبر والديها بما حصل لكنها توقفت في اللحظة الاخيرة..و قالت في نفسها: يعني اجا يشوفني بالجامعة ...اصلا منيح اجت منه ..كله ما عجبني..الفكرة ازعجتها كثيرا لكنها اجلت التفكير بها لان راسها الان لا يحتمل

اعتذرت من والديها مرة اخر ووعدت ان لا تكرر ما حدث و توجهت الى غرفتها

ديمة: الاتصال ضعيف بالمكتبة اه..حبيبتي هاي حركات البطارية منعرفها منيح..كنتي مع حسام
داليا: لا والله ولا شفته..اسكتي ووطي صوتك و تعالي شوفي شو اشتريت

جلست الفتاتان على السرير و بدات داليا تروي لديمة ما حصل في هذا اليوم المميز

*****


المشهد الثالث

المكان: منزل حسام

جلس حسام في غرفته و علامات القلق و التوتر بادية عليه..حاول عدة مرات الاتصال بداليا لكن هاتفها لا يمكن الاتصال به..ارسل عدة رسائل نصية لكنها لم ترد

..
فتح اللاب توب ليلهي نفسه عن التفكير ..منذ زمن طويل لم يكتب شيئا في مدونتة الحديثة نسبيا..تعجب كيف يستطيع الاخرون و بكل بساطة الكتابة عن خصوصياتهم .تمنى لو استطاع ان يضع مشاعره على الشاشة امامه فلربما استطاع ان يفهم ما يحدث بداخله

..
هل حقا كل ما يكتبه هؤلاء المدونون حقيقي ..دون زيف؟ دون تجميل للحقائق؟ هل كل هؤلاء هم بالفعل كما يبدون..رومانسيون حساسون..يهاجمون الكذب و الرياء و يدافعون عن المبادىء و الاخلاق ..ام انها ايضا اقنعة اخرى ..مغلفة بالعسل لاجتذاب المزيد من الاستحسان و التعاطف..؟؟؟ امعقول ان يكون كل هؤلاء صفوة البشرية..من غير خطيئة ولا اخطاء؟

قرا ما كتبت داليا و احس بالحنين يشده اليها ..لم يعتد منها هذا الاهمال...عاد و امسك بهاتفه الجوال و بحث عن تقارير استلام الرسائل..رسائله وصلت ..لما لم ترد؟

طيب يا داليا..بيصير خير

ضغط على زر الاتصال و سمع صوتها على الطرف الاخر

حسام و قد انتابته موجة من الغضب لم يعهدها في نفسه: في كتير اشياء بدك تفسريها

داليا: طب قول مرحبا بالاول ..مالك معصب شو في؟
حسام: وين كنتي و مع مين؟ و ليش ما بتردي عالمسجات؟
داليا: طب رووء ..انا لسة طالعة من خناقة مع اهلي مش ناقصة
حسام: و الله حلو..مش ناقصك انا؟ يعني اسكر و اقلب وجهي؟ هيك بدك
داليا: انا ما قلت هيك..طب اعطيني فرصة اقولك شو صار..
حسام: .....هيني سامع..
داليا: انا راجعة مبسوطة من برة و اهلي و نكدو علي ما تكون انت كمان هيك
حسام: راجعة من وين ..؟

داليا بحبور شديد: اما شو يا حبيبي شو انبسطت.هالبنت بتجنن..طلعنا عملنا شوبينغ....مش معقولة شو ذوقها حلو وما بهمها الاسعار...انا ما قدرت اشتري زيها..ولا العشا يا عيني عالمطعم..
حسام: استني استني..شوبينغ و عشا و مطعم..هلأ نادين من ايمتى بتطلع هيك طلعات؟
داليا: مين جاب سيرة نادين؟..انا ما كنت معها.. شو جاب سيرتها؟
حسام: ولا مين الي مبهورة فيها و طايرة طيران؟؟
داليا:ميراندا يا حسام..يا الله شو ظلمت هالبنت..هاهاهاه و قال شو... كنت اغار منها

حسام مذهولا: م مم ميراندا...انتي و ميراندا؟ مع بعض؟ مش مستوعب
داليا: انا و ميراندا كانت صحبتنا هاي هاي..يعني سلام سريع و مرة شربنا قهوة سوى..تفاجأت فيها اليوم بتقولي ياللا نطلع بدي احتفل..و انا كنت مخنوقة و مش طايقة ما صدقت ..
حسام بحذر شديد: تحتفل؟ شو قالت لك يعني.ع عن شو حكيتوا
داليا: اليوم وافقولها على شغل و حبت تحتفل معي و عزمتني

احس حسام انه لو اطال الحديث اكثر فسوف يضطر ان يشرح لداليا الكثير.
مئة سؤال دوّى في رأسه..لم يعد يسمع ما تقوله داليا

..
.يعني عجبت السيد الوالد اللي ما بعجبه العجب..ليش ما حكت معي و خبرتني؟؟ و ليش داليا؟ يعني من كل بنات الجامعة ما لقت الا داليا

داليا: و بعدين تخيل مشينا حافيين عالاسفلت و مير..حسام..انت سامعني؟
حسام و قد هدأت نبرته : اه طبعا.. طيب الحمد الله اتطمنت عليكي انا بس قلقت لما ما رديتي عالمسجز..اهلي بوكرا مسافرين على ايطاليا و لازم اروح هلا ..منحكي بوكرا..بس يسافروا.بتقدري تطلعي اشوفك؟
داليا: بوكرا الجمعة و بعد اللي صار اليوم ما بعرف اذا بقدر اطلع ..بس بشوف
حسام: اوكي حبيبي ...موا..باي
داليا: باي حياتي
حسام: ما في موا
داليا: حسااااام..بلا بياخة..ياللا باي

لم يخبر حسام داليا ان ميراندا ستعمل في شركة والده..لا يدري لماذا تعمد الا يخبرها..مشاعره نحو داليا لم تتغير بلعكس فلقد اصبحت اقوى ..لكنه لم يعلم سببا لتصرفاته الاخيرة مع ميراندا ...ميراندا.لغز محير.من اين اتت بالنقود و قد اخبرته انها على حافة الافلاس

خرج من غرفته ..احس بالاختناق و بحث عن والدته..وجدها جالسة امام الكومبيوتر و قد بدت كأنها في عالم اخر..اقترب منها و احاطها بذراعيه

حسام: شو يا حلو.. لسة ما لقيتي المحلات اللي بدك ياها

هيام وقد انتفضت من مكانها..:نئزتني..ما تعمل هيك مرة تانية

ابتعد عنها حسام بسرعة و قد فاجأه رد فعلها

حسام: مالك ماما ؟؟ ليش عصبتي؟؟..انا بحكي معك عادي انتي يمكن كنتي سرحانة
هيام: اسفة ماما مش قصدي بس ما حسيت فيك و انت جاي عالغرفة

لفت نظره نافذة محادثة تضيء و تومض

حسام: شو يا... من ابمتى بتعملي تشات؟ و مع مين
هيام:ا ا انا ..هاي صاحبتي .بتتعلم عالانترنت و حبت تجرب التشات..و انا بساعدها
حسام: ..سلمي لي على صاحبتك ..ولع المسنجر يا هيام الحقي..
هيام: سيبك انت من هالحكي.شو كان بدك مني
حسام: طالع مع الشباب اشوف امجد اجا من اميركا ..ما بتأخر برجع بلاقيكي صاحية..بدي اشوفك قبل السفر
هيام: اوكي حبيبي ..دير بالك الليلة الخميس و الناس كلها بالشوارع

غادر حسام غرفة الجلوس و عادت هيام الى شاشتها و كتبت

هيام: مش ضروري اخد رقم من هناك معي موبايلي و بس اوصل بيصير جوال...ببعتلك مسج..بس ما رح اقدر احكي..هلا لازم اروح...

****

المشهد الرابع

انطلق حسام بسيارته و اذ به يسمع رنين هاتفه النقال

..
حسام: اه ابو الشباب وينكم
فيصل: بتقدر تمر علينا؟سيارتي ما عم تشتغل
حسام :ماشي ..امجد عندك؟
فيصل: امجد من الضهر عندي تغدينا سوى

غير حسام طريقه و عاد متجها الى بيت فيصل ,لكنه لم يتوقف عن التفكير لحظة بكل السيناريوهات التي ستحدث لاحقا..الكثير يشغل باله...داليا..ميراندا..عملها مع والده..ترك امر المواجهة لحين حدوثها...ربما لم تخبر ميراندا داليا بما حصل فلما يستبق الاحداث؟؟

وصل الى منزل فيصل فوجده في الشارع واقفا مع امجد..نزل من سيارته و اتجه نحوهما و عانق امجد عناقا حارا

حسام: حبيبي ابو المجد ولك اشتقتلك ..طولت الغيبة يا رجل

امجد: شو نعمل هيك الدراسة..ما صحلي اجي بالشتا ..اشتقتلكم و اشتقت للعمان و طلعاتنا ..اه وين ناويين تسهروني؟
فيصل: انت اطلع بالسيارة و بتعرف بس نوصل ..عمان تغيرت كتير السنة وفي محلات جديدة

استقل الثلاثة السيارة وادار حسام المحرك و لم يتوقفوا عن الحديث و الضحك..فكرة الخروج الليلة بالذات كانت ممتازة فقد ازاحت الكثير عن كاهل حسام المثقل بالهموم

وقفت السيارة على اشارة ضوئية بينما كان أمجد منطلقاً يتحدث

أمجد: ... و هيك كل ما بدخل مطار باتفتش عشوائياً، ما كنت باظن إنه هيك إسم بــ

..
و قطع عبارته و هو يحدق من النافذة في شرود إلى تلك السيارة الصغيرة التي انبعثت منها أنغام إحدى جنائزيات موزارت بصخب و هو يردف بشرود

امجد: معقولة؟ هاي... شو جابها هون؟

نظر حسام و فيصل باتجاه السيارة الصغيرة التي تتقدمهم

..
فيصل: مش هاي البنت اللي معنا بالجامعة..الاسبانية
حسام وقد علت وجهه الدهشة : اه هية....ميراندا

امجد: ميراندا؟ يمكن انا غلطان..في وحدة كانت بسياتل لما زرت ابن عمي كانوا يحكوا عنها بس اسمها كان غير..شفتها اكم مرة بتشبه هاي كتير

حسام: مالها يعني؟
امجد: مش متزكر بالزبط بس بعد ما شفتها قالوا انها اختفت بظروف غامضة..انقلبت الدنيا عليها و طلعت مية اشاعة انها سي اي اية و انها مع المافيا و ناس قالوا انقتلت و ناس قالو الاف بي اي خبوها..اكيد انا غلطان شو بدو يجيبها هون

حسام: لا اكيد مش هية...هاي بنت مسكينة بتدرس هون

تغير لون الضوء الى الاخضر و اتجهت سيارة ميراندا الى يسار الطريق فيما تابع حسام طريقه الى مكانهم المنشود، و أمجد يكمل حديثه ببراءة

أمجد: نسيت ااقولكم.. اخدت شقة جديدة بكاليفورنيا إنما اشي غير شكل.. لازم تيجوا تزرورني يوم بس قبل العرس
حسام: شوعرس ما عرس؟؟؟
أمجد: هلا ما وصلك إيميلي؟
حسام: ما وصلني شي
أمجد: أنا رح اتجوزعن قريب
حسام بفرح: ألف مبروك
أمجد: الله يبارك فيك و عقبالك انت و داليا

جعلته الجملة الأخيرة يشرد كثيراً و هو ينحرف بالسيارة و ابتسامة باهتة تزحف على وجهه، و تساءل بشغف في قلبه

امتى بيجي هادا اليوم؟